Leid, i sogs eich, in da fria
mim Bus fahrn, des is de reinste Katastroof. Meistns isa eh scho z'schbäd
dro, aba a wenn a pünktlich is, dann is a oiwei scho so foi, dasd
fast koan Plooz mehr griagst. Manchmoi frog i mi, wos de leid olle so fria
scho auf dean, und wieso de scho so fria in d'Awad fahrn. Oba obgseng vo
dem, kennen de vo dera Busfirma ned no oan Bus zusätzlich fahrn lassn?
Naa, geht ned, des is doch dene wurscht wia se da Fahrgast, der wo ja ned
grod wenig fia den gschissna Söawiss zoit, in da friah umanandaärgern
deaf.
Wos sois. Jednfois san oft a
scho fui Kinda in da fria im Bus drin, de in d'Schui fahrn. Und de san
ned grod de, de
wo s'Mei hoidn. Naa, de plean
umamand, dasd moana kannst, de hod oana umanandag'watscht. Und wennst so
am Gribbe dann a Schelln odrohn duast, nacha redda oft no recht bläd
dahea. Do is gscheida, ma sogt glei nix und ärgert se so stad in si
nei. Ja und an Siezplooz griang is a ned so leicht. Entweder hockt
so a gschroamaulada Fratz scho dort, danem sei debbade Schuitaschn, oda
es hockt a andana dort, der wo a zwoa Siez braucht. Oan fia si seiba, den
andan fia sei gschissne Agdndaschn. Oft deng i mia, etz gehst hi, und redst
den deamassn bläd o, und dann schaugst amoi, wos a dann sogt. Oda
i deng ma, i geh hi und hau eam sei Agdndasch vom Siez weg middn unda d'Leid
nei. Gmacht hob i des zwar no nia, aba i glab, irgendwann mach is
doch amoi. Song duad do eh koana wos. A jeda steht drin und hockt drin,
schaugt recht bäs oda recht bläd, bei manche kimmt a ois zwoa
zamm.
Am ollascheenan san aba de,
de wo eischdeing und dann glei bei da Dia wieda steh bleim, das der wo
danoch kimmt nimma gscheid vabei kimmt. Mei, i sogs eich, so oam dad i
am liabsdn vo hint ins Kreiz dreen, das eam d'Rippn gracha. Oft sans Rentner,
de wo ja agrad in da friah wo hi miassn, wo andana in d'Awad fahrn. Und
des, obwoi dene eana Seniorenkardn um de Zeit no gor ned guid. Oda
de Weibaleid, de wo recht ogschmiad san im Gsicht, dasd moana kannst, dene
feid wos. Ned bloss oamoi hods mi grissn in da fria im Bus, wia i mi nixahnend
umdraht hob, und in so a Gsicht neigschaugt hob. Und ned bloss oamoi hob
i mi dann gfogt, wias des gibt, das a soichane a oan gfundn hod. Macht
aba nix. De Ogschmiadn Weiba hoidn meisdns eh eana Mei, weis Angst ham,
das eana sunst d'Farb ausm Gsicht foin duad.
Ja und dann no de wo hind stengan,
und dann fiare woin zum ausschdeing. Do wead dann gschubst oda grembet,
und mancha sogt sogoa wos. Do heast dann Sacha wia "Tschuidign'S bittschen"
oda "Deaffad i bittschen voabei" oda wenns Preiss is, dann meistens bloss
"Jestatten Se ma". Wos de in da fria in am boarischn Bus valoan ham dad
mi a indaressian. Ja und dann da Busfahra seiba. So gseng is er ja
a arme Sau wenn mas genau nimmt. Deaf se ograndln lassn vo grandige Leid,
und bläd oren wenna wieda so wia fast jedn Dog z'schbäd dro is.
Aba manche vo dene Fahra stein se scho recht bläd o. De bleim an jeda
Ambe steh, de fahrn auf da Hauptstrass Dreissge, und vui san a dabei, bei
dene kannd ma moana, de ham no nia wos vo am Fahrplan ghead. Und dann gibts
no de Spezies vo de Busfahra, de wo sogoa reen kennan. De song doch pfeigrod
a jede Hoidestei duach, obwoisd bei de meisdn eh nix vaschdehst wos song,
oda deszweng nix vaschdehst, wei de Laudsprecha vo oam eigschdeid woan
san, der wo anscheinend schlecht oda goa nix head.
Am scheensdn is oiwei dann,
wennma ausschdeing ko und den Bus mit dem grandign Inhoid voabeifahrn sicht.
Und no scheena is an soichane
Dog wenn ma goa ned easchd eischdeing muass, nämlich dann, wenn ma
Ualaub hod oda wenns Wochenend is. Und mia gfoids am ollabesdn an
dene Dog, wenn i dahoam bleim ko, und i mia dann voaschdei, das grod etzad
um de Zeid wieda a boa grandige Leid im Bus fahrn miassn.
(Bertl, 22.08.1998)