Haudi so wia "Gaudi", nua mit "H", wia "Hawara".
Heads, i sogs Eich! Lautar Floschn! Wea? No de Geleertn! Wissds eh, wos Geleerte san? Naa, i wue doda ned schimpfn, auf de vuen Profaksn, Doktan, Diblouminscheneare und wos waas i. Oba de Geleertn, des san lauta Floschn! Des kennds ma glaubm. Schliesslich hob jo des ned i darfundn, des is a Dodsoche.
Najo, so veroigemeinern deaf ma jo aa wieda ned. Hobds scho rechd. Maunche san jo eh gaunds guad augschriebm, oba aundare wieda goa ned. So wia des hoid is, bei de Leit. Dabei is no goaned gsogd, dass de, wos ned so guad augschriebm san, oda goa ned, ned doch de Bessern san, weu des schdoed si jo imma erschd im Nochhinein ausse. So is des nemlich. Solaungsd lebsd, guedsd nigs, erschd wauns aus is mid dia, dedns rean.
So is des mid de Geleertn aa, bei maunche kummd ma rechd boid drauf, obs guade woarn, bei maunche erschd weid hintn noch.
Jedsn woa jo Ostern, Feiadog, ned woa? Und do gibds ollaweu bsundas vue Geleerte, dsu de Feiadog, jednfois mea ois sunsd, wauma so im Durchschnid schaud. Woraun des wieda liegd? No weu de Geleertn Floschn san!
Bei mia daham sans aa wieda mea woarn. Na, wos dsvue is is dsvue! Is ma ds'bleed woarn, mid de Geleertn, weu goa so vue umanaund gschdaundn san. Hob is hoid aufd Seitn graamd, untad Koellaschdiagn hob is glegd. Duatn is a Ruah mid eana.
Um Gottes Wuelln! Wos glaubdsn Es jeds vo mia? I bin doch ka Meadara! I hob neamnd umbrochd! Do dedad i jo scho lengsd in da Dseidung schdeh, Taeglich Alois, oda wia des Schundbladl hassd.
I hob de Geleertn gaunds vuasichdig higlegd, dass eana jo nigs gschiachd. Weu iagndwaun hoid mas jo doch wieda viere, weu mas brauchd, ned woa?
Daun faungd mas viere, und lodnds in Koffaraum ei, und fiads fuart midn Auto, dsum Lufdauslossn.
Daun hoid ma si wieda wo a boa so neiche Floschn, und kaum hosdas gsehng, san de aa scho wieda Geleerte! A Jaumma is des!
Na, Es sechds scho, i hob a innige Bedsiehung dsu de Geleertn unta da Koellaschdiagn, dsu de rodn Geleertn und de weissn Geleertn, de gruenen und de klaan braunen, des wos so noch Hopfn und Moids riachn! Hoehoe!
Lauta laare Floschn schdengan unta da Koellaschdiagn, Hoeheo! Wauns Es no ned kapiad hobds, Es Floschn, hed i boid gsogd!
Wuevue Geleerte hods bei Eich ueba Ostern gebn?
Is jo wuaschd, seids sche braav, und schdoeds nigs au, wia da Hea Raedl vo Radio Dsedeh ollaweu sogd, weu sunds kummd de Bolidsei!
Griass Eich, i wuensch Eich wos!
Haudi.