Haudi so wia "Gaudi", nua mid "H", wia "Hawara".
Hob i a Glick ghobd, dass da Ernstl de Gschichd midn Rieh bestaetigd hod! Es haeds mas jo wieda ned glaubd. I kenn Eich jo scho. A bissl schwierig woas scho, gib i dsua. Hobds es olle des Rieh gfundn?
Fia de, wos des ned so gauns gschbaund haum, a klane Erklaerung:
Es Rieh wohnd in soichane Weata wia - duri (tu ich), wari (waere ich), wiari (werde ich), gehri (gehe ich) undsoweida. Des san jo no de klan Riehs, oba waun ana sogd: "Desbirieh", des is nochan scho a kapidales Rieh, ned woa?
Mutationen vom Rieh san a scho vuakumman. Des woa so, bassds auf:
Wiari (a Rieh! hobsd es?) no jung, dumm und gefraessig woa, jedsn bin i nimma jung, nua mea dumm und gefraessig, do san ma amoi dsu dritt in Wean umanaundadsigeinad, i und no dswa Hawara. No, wias hoid so is, hauma an Flamoo, an Hunga kriagd.
Foi ma in so a Beisl eine, wo's dswaralei Kuchln gebn hod. I man hoid, se haum gschriebm "Wiener Kueche", und es woa oba a Kinees, oda sunds wos, i waas des nimma so gnau.
No, i hob nigs riskiad, hob ma hoid a Gulaschsupperl bschdoed, und a Kriagl, so an grossn Hunga hob i jo aa wieda ned ghobd. Oba da ane vo meine dswa Hawara, da Bumsdi, a Klana, Gfueda, dea hod wieda eischneidn miassn ois wia.
Hod si beschdoed an "Schischkebab" oda wia dea Dings ghassn hod. Noch ana Weu kummd da Kellna wieda, a blosses Gsichd hoda ghobd, und gaunds schmole Augn, und frogd en Bumsdi: "Pommes odel Leis?" Da Bumsdi schaud eam au, dengd a Weu noch, daun sogta:
"Bringansmaranreis".
Na dea hod des vaschdaundn! Hoehoe!
Seids sche braav, und schdoeds nigs au, wia da Hea Raedl vo Radio Dsedeh ollaweu sogd, weu suns kummd de Bolidsei!
Griass Eich!
Haudi.