Griass Eich, Haudi!

Haudi so wia "Gaudi", nua mit "H", wia "Hawara".

Heit damma a bissl Natualehre duachnemman. Hobds eh aufbassd, domois in da Schui? I muass amoi gföd haum, weu des Viech, vo dem i Eich dadsön wü, vo dem hob i in da Schui nigs ghead. Des hod ma lei a Kaandna dazöhld.

Es gehd dabei gnau gsogt um Voglkunde. Des is ned die Kunde v o m Vögln, wias Es vielleichd glaubts, des is die Kunde v o n d e n Vögln.

Dea Vogl, den i Eich vuaschdön wü, des is da Uihui-Vogl. Wieso dea an so komischn Nauman hod? Na, gaunds aafoch, es wern jo vü Vegl noch ihrm Ruf benaumnd. So dsum Beischbü da Pirol, dea sogd imma sowos wia "Guglfiahaus" oda so, oda da Schbottvogl, dea sogd "hjiahjiahjiahjia", no und da Uihui-Vogl hod hoid sein Nauman aa noch sein Ruf.

Da Uihui-Vogl is a bissl aundaschd baud, ois de aundan Vegl, hoid wos es Vegln bedriffd. Naa, scho so, dass es Weiberl a Oa legd, und daun ausbriat, oba es Mandl is a bissl aundaschd, echa so wia bei de Seugediare, des hod nemli so - no wia sogd ma do - so - - - so Ding, na wissds eh scho, rechd grosse aa no, - de Ding. Nua an Föhla hod des oame Vogerl hoid, de Haksn san eam a bissl dskuads. Wissds eh, in da Schöpfung is aa ned ois so optimeu grennd, de Ölefauntn haum jo a so a launge Nosn, und de Schiraffn hod an so an laungan Hois, und en Uihui-Vogl gehds hoid wia an Dakl, dea hod aa dskuadse Fiass. Da Dakl kaun mid seine kuadsn Haksn ned schnö renna, und da Uihui-Vogl kaun goa ned renna, oba dafia kauna jo fliagn, und des kaun a Dakl jo wieda ned.

Oiso, fliagn kaun da Uihui-Vogl jo rechd guad, nua beim Laundn hods eam daun, ebm weu de Hakserln dskuads san, schdraafda mid de - - - no - - - de - - de - de Ding auf da Eardn, befur dassa schdeh bleibd. Und dabei singda: "Uiuiuiuiuiuiuiuiuiuiuiuiiiiiiiiii!" Nua beim Laundn singd da Uihui-Vogl, sunsd nia. Komisch, wos?

Übrigns, es Weiberl singd ned, so wia des hoid bei de meistn Vegl aa is.

Na, wos sogds jeds? De Natua is volla Wunda, gö! Höhö, Fosching is! Glaubts eam ned ois, en Haudi, dea drukd Eich do wieda a Gschichdl eine!

Auf jedn Foi:
"Chanche braaf und chdön'Ch nigch aun, weu chunch kummd de Bolidchei", wia da Hea Rädl vo Radio Dsedeh ollaweu sogd.

Griass Eich, i wünsch Eich wos!

Haudi.


28 Nov 1994, Haudi