Haudi so wia "Gaudi", nua mid "H" wia "Hawara".
Na oiso, jeds is soweid. Mia woan in Teesdorf. Wos is Teesdorf und wea san mia?
Tees, is des de Meazoi von Tee? Wos waas i, Tee hod iagndwos mid "ziagn" zduan, Teesdorf owa aa. I kenn mi ned aus. Is jo wuaschd. Und mia? Mia, des woan da Erik, da Richad, da Eanstl, kennds eam eh - da Entdecka vom Rieh, de Babara, mei Kollegin - weads vielleichd aa scho kennan, da Heidi, mei Schbezl - naa, ned d i e Heidi, is scho richdig, d e r Heidi, daun sei Bruada - da Gristian, da Füani - dea wos in sein friaran Le'm amoi a Bit in iagndan Kombuta gwesn sei muaß, da Fraunz - da Schef vom Heidi, vom Füani und vo da Babara, da Helmut - oba des is ned da Leitna Helmut, da Helmi, da Bodemasda vom Deresienbod, sundan mei Schef, und da Haudi, meine Wienerischdamarednkeid. Zehn Leit, wauns richdig midzöhd hobds.
Wos ma duatn gmochd haum? A bissl "Ziagn" hauma gübd, und sunsd aa no wos, midn Auto samma in da Woschmaschin gwesn. Deswegn san unsare Autos oba ned sauba woan, nix, gaunz im Gegndeu, saudreckad sans woan.
Na, jez ohne Schmä: In Teesdorf hod da ÖH AH EMM TE ZEH a Foadechnikzentrum, duatn sans no bessa ois in Zinklschdoa, duatn kennans fosd ois simulian, wos an so bein Autofoan bassian kau. Do foasd zum Beischbü en Semmaring auffe, auf da an Seitn is schdrohlenda Sonnenschein, kaum foasd obm drüba, faungds es Schüttn au, und de Schdrossn is schbiaglglott. Daun braugsd nuamea aufd Bremsn schdeign, und es Ringlgschbü is fertig. Und daß da ned fad wiad, is untn glei so a Rundumadumkurvn, wias hoid in de Berg is.
Wos haumsn no duat?
An Teich, dsum Akwablaning browian. Waunsd schdebleibsd gehsd unta! Höhö! Na, nigs, des is a Wossalockn, bei dea ma en Schdoppl aussedsiagn kaun, daun rinnd es Wossa davo. Und wauns en Gulli übagehlossn, is de Lockn wieda do.
Nochn Mittogessn, ois Nochschbeis, die "kleine Kuppe mit Schlag", garnierd mid Schlankerlkurvn. A Gschichd, sog i Eich, waunsd sowos in echd konsumiersd, hoid di eh glei da Heazkaschbarl! Und de Woschmaschin! A Gaude! Waunsd ois richdig mochsd, foasd auf da an Seitn eine, und auf da aundan Seitn kummsd gwoschn und gschleidat wieda ausse! De Babara hod des guad kennan, wiasis fiara Hausfrau ghead! I hob des friara aa guad kennan, waun mei Mutte im Winta Wesch gwoschn hod, und a schena Schnee glegn is, hob i ollaweu gsogd: "Mama, gib'd Wesch hea, i foa Schleidan!".
Jeds gehd des nimma, entweda gibds kane gscheidn Winta mea, oda i werd scho oid.
Na, oba duatn haumas uns no so richdig gem! De haum jo in Teesdorf de geilsde Schdecklbflosdakuavm vo Vurarlberg bis zum Neisidlasee! Fronttriebla foan is duatn so wia Tee kochn:
Einehengan und ziagn lossn! Voi dakwea! Affengeil! Do siachd ma daun, wea de Kurvnwixa san! I sowieso, oba da Heidi, da Gristian - sei Bruada, und da Richad gnauaso!
En Gristian sei Lenkradl! I sogs Eich! A so a obgfackdes Ding hobds übahaupt no nia gseng! Schene Sochn ded i ma dengn, vom Gristian, waun i ned wissad, daß des Lenkradl da Heidi, mei Schbezl, oogfackd hod! Vo dem deng i ma ohba nix mea. I woa nemli eh zeidnweis dabei, beim Lenkradloofackn!
Na und da Füani! Dea hod sis gebm! De klane Kuppn isa auf da Diaschnoin gfoan!
Da Erik woa mim Kempingbus untawegs, do muaß auf de Kamöbuckln de Bierdosn im Kühschraunk zrissn haum! Des muaß daun iagndwia in Motoa einekumman sei, weu zeidnweis is hintnnoch da Schaum aussekumman! Aufn hassn Auspuff! Des hod graukad! Sakra!
Mei Schef, da Helmut, is ned so narrisch gfoan, weu wiara en Gristian sei Lenkradl gseng hod, hoda Aungsd kriagd, daß si ned nua des Raafn oofoan, sondan es Lenkradl aa! Da Eanstl hod vadsweifld browiad, ob a eana in Teesdorf wieda amoi de Gschwindigkeitsmessaunlog zaumfian kau, wia im Ochdadochzgajoa, oba dea hod vü zu guade Raafn ghobd, do issa ollaweu zfrua schdeh bliebn, Scheise, is ned gaunga.
I hob es AH BEE ESS ausgschoitn, weu ma da Fraunz Aungsd gmochd hod. Wissds eh, wia sowos funkzioniad? Waun es Radl blockiad, oiso schdeh bleibd, mochd de Bremsn auf, daun mochz wieda zua, und waun es Radl wieda blockiad, mochz wieda auf, und so weida. Bis dassma schdehd. No und, waunsd schdehsd, daun schdehd es Radl aa, daun mocht de Bremsn wieda auf? Do kaunsd jo bergloo nia schdehbleim! I trau jo so an neimodischn Zeig nix. Aus, wegga damid! Da Fraunz woa mutig, dea hod des drozdem ausbrowiad, und schau au, es Auto bleibd doch schdeh!
Jo wia mochdsn des? Haumma beim Mittogessn dischgriad, aah, des Ahbe-ess wird aafoch aufn Tacho nochschaun! Waun se da Zaga nimma riad, schdehd de Kraxn, so wiads sei! Hob is hoid daun doch wieda einedau, des Antidingsklumpad. Hoffma hoid, daß da Tacho ned amoi bei an Hundata hengan bleibd! Des warad a Busara!
Haaaaawedeeere! Do kennds Eich daun Eichare Gschichdln söwa schreim!
Najo, loss ma des. Wos würi no sogn? Mia woan jo ned allaanich duatn, in Teesdorf. San aundare Autos aa no gfoan. So weisse Autos, deuweis mid so Ding, - Heidlbeean obn drauf, und BEE GEE is aufn Nummerntaferl gschdaundn. Wos des hassd waass i ned, oba so wias gfoarn san, kau des nua hassn: Bleda Gehdsned. De san gfoarn, daß de Fezn gflogn san! Jojo, so sans, unsare - Ding! Waun Eich de amoi vafoign, mid Blauliachd, brauchds kaa Aungsd haum, de drahn si eh glei in da erschdn Kuavn ei! Höhö!
Na, is hoid rechd zuagaungan in Teesdorf. A Hin und a Her, wia da Hea Raedl vo Radio Dsedeh sogn ded. Eine Riesnhez woas. Oba zum Schluß vagehd da daun es Lochn: Waunsd wieda aussefoan wüsd, und du bisd ned gscheid gfoan, kassians da es Lenkradl! So wia de Jaga eanare Zwölfenda und Sechzehnenda aufhengan, haum de duatn de Momo und Italvolanti hengan, vo de Vauochd, de Sechzehnvau und de Turbogete i.
Neilich gehri bei an Schdrafnwogn vuabei, schau eine, hod dea ka Lenkradl! Glaubds, woa dea in Teesdorf?
Seids sche braav, und schdöds nigs au, wia da Hea Raedl, weu suns kummd de Bolizei!
Zfuass, is eh kloa, weu autofoan kennans ned, mia haums gseng.
Schauz amoi vuabei in Teesdorf, oba nemz Eich a Reseavelenkradl mid! Höhö!
Griass Eich, i wünsch Eich wos!
Haudi.