Kennds mi no? Wissds eh, da Hawara mid da Gaudi.
No, do bin i wieda. Aus is min Einsiedln. Drei Joa woit i bleim, nedamoi drei Monat sans woan. Warum? No ausseghoid haums mi! De Kiwara! Min Sondakommando! De san jo jeds gaunz - Ding - wia da Hea Rädl sogn ded, waunna auf Radio Dsedeh no wos sogn kunntat. Weu ma jo waass, wos in ledsda Dseid ois vuagfoin is! Schreckliche Sochn, und glei in da Nachn, wori Einsiedln woa!
Do haums doch zwa Varbrecha gjaukt, dogelaung, und daun woa jo a des mid den Italjano, dea wos in Olmüz an Kwargl zaumdrahd hod! Und mi haums aa aussagfassd, wiaran Schwavabrecha, dabei hob i jo goa nigs dau, aussa mid mein Geemboi gschbüd. Na guad, dadsöri Eich, wia des gnau woa.
No, i woa do scho a gaunze Weu in mein Varschdek, woa ois leiwaund, da oide Hea von Beckngschefd hod ma ollaweu a frisch Brod brochd, und hod imma gfrogd, obs ma eh guad gehd, ob i sunsd wos brauch, und hod ma hoid a gsogd, wos in dar Wöd ois los is. Gaunz weg woari eh ned vom Fensta, mei Geemboi is jo eh am Intanet ghengd, i hob oiso ois midkriagd, wos do so grennd is, ned daß glaubds. Oiso, wia gsogd, i woa friedlich bein Einsiedln, nua zwa Brobleme hob i ghobd: da Rode is schnölla goa woan, ois i glaubd hed, nojo, hob scheinboa a bissl knopp kalkuliad, mid de 150 Lita auf drei Joa hed i jo grod a Ochtl und an Schluck dringa deafn, aum Dog. Des is si natirli ned ausgaunga, weu von Geemboischbün wird ma urntlich durschdich, kennts ma glaubm. No und des Gschbü do aufn Geemboi, des woa ma ned wuaschd. Jedsn hob i doch scho wochnlaung gübd, und imma no ned gwunna. Des hod mi aufgregd. I waass jo goa ned, wia des Gschbü hassd, auf jedn Foi san do a boa so Kaschbaln ollaweu auf und oo ghupfd, und dabei imma nahda kumman. De hed ma ooschiassn soin, weu wauns an am Schedl hupfm, is ma söwa hin. No i hob browiad und browiad, und bring niz zaumman. Gaunz grantich woari scho, und es Fluachn hobi augfaungd. "Woaz nua es Kaschbaln, es komischn, eich darwisch i scho no, brauchds ned so bled ummanaundhupfm!" hob i gschrian, und dabei is ma scho wieda ana am Schedl ghupfd.
Auf amoi klopfds, schaud da oide Becknmasta, a liaba Hea wia gsogd, eine, und frogd, wos los is, daß i asoo schrei. Ma head des jo wass God wia weid. No i hob ma des zu Heazn gnumma, und hob daun a bissl leisa gfluachd. Nua maunchmoi, waun i scho a Mandl darwischd hob, und daunn is ma wieda ana auffeghupfd, hobi hoid wieda laud gschumpfm und gfluachd, daß vo da Deckn de Erd obabresld is. Es woa jo a wirkli zum aus-dar-Haut-foan.
No, i hob wieda amoi so friedlich gschbüd, hob grod en Schdoppl vo ana Weifloschn einedruckd - Schdoppldsiacha hobi jo aa kan ghod - nimm an Schluck, auf amoi pumpads draussd, daß i mi glei varschlickd hob. "Dans aufmochn doda!" hod draussd ana gschrian. "Kummans aussa und eagebn Se sich Ihna!" I hob gmand, i hea ned rechd. "Sads damisch oda hobi schlechd dramd?" hob i gsogd. Hod dea draussd brüd: "Kein Wiederschdand, oda mia schiassn!" Pfu! I hob an so an Schreck kriagd, daß i bein Geemboi en Feia Battn druckd hob! "Jessasna!" hob i gschrian!
"Und i schiass a glei!" Auf amoi reissd dea Hawara des Tial auf, und i schau in a Puffn! "Gebms hea Ihna Woffn!" hoda gschrian! An Kaumpfaunzug hoda aunghobd, meingod, i hob mi gfiachd! No druck i eam mein Geemboi ind Haund, und hob gsogd: "Doda, do haums, schauns ob Se's bessa kenna, waunns scho so guad schiassn kenna!" Schauda mi bled au, und schdöd de Puffn oba. "Wos isn des?" hoda gfrogd. "A Geemboi" hob i gsogd, "bassns auf, dea is no eigschoit, und waun eana des Mandl do drin aufm Schedl hupfd, sans hi, so wia i scho seid nein Wochn!" Schauda no bleda drei, dea Hawara, schaud mi au, schaud en Geemboi au, auf amoi faungta ens Lochn au, bead si o ois wia, und schreid: "Burschn, kennts aussekumman, ka Gefoa!" No jeds hob i bled gschaud! Kumman ausn Gebüsch ummadum no zehn so Hawara ausse, im Gsichd augschmiad, a jeda, und a Buschka haums ghobd!
I bin nocha aa aus mein Loch aussakreud, und olle haum se um mi umadum aufgschdöd und glochd. Hob i gfrogd: "Zwengan wos hobds mi denn do aufgschdebad?" Hod ana gsogd, daß si Schbaziagenga beschwead hedn, daß do ana in ana Höhn hockd, und wüste Drohungen ausschdössd, und imma vom Darschiassn redt. Wauns glaubm daß des so aafoch is, soinses browian, hob i gmand. Prompt hod a jeda min Geemboi browiad! No des heds easchd hean soin, wos de ois gsogd haum!
Najo, des is eana oba daun aa fad woan, und da Kapo hod gsogd, "Gö, oba jez is Schluß mid dem Schbass, jedsn dans ausrama doda, und mia bringan Ihna wieda ham, und Se kean sche wieda ins ziwilisiate Lebm zruck!" Und mia haum de Floschn olle zaumklaubd, woan eh scho mea laare ois volle, und san hamgfoan.
Daham haums ma no bein Auslodn ghoifn, und bevuas gaunga san, frogd mi no da Schef, "Oba jez sogns ma scho no, wea Se san!"
Hob i gsogd: "Da Haudi". "Ah, jez is ma kloa!" hoda gsogd, "da Haudi! Hed i ma doch glei denkn kenna! Najo, daunn, wissns eh, sans sche braav in Zukumft, weu, wias gseng haum, kummd schnölla ois ma glaubd de Bolizei! Pfiat Ihna!" - Und wegga woans.
Soda, des woas, hed i Eich wieda a Raubasgschichtl einedruckd!
Oba, passds auf wo's hiischdeigds, bevuas mia wos glaubts, damit's Eich kan Schaas eitredn deids! Höhö!
Griass Eich, i wünsch Eich wos!
Haudi.