Haudi so wia "Gaudi", nua mid "H" wia "Hawara".
Oiso, mid a boa vo meine Hawara hob i des eh scho beschbrochn, i sogs Eich oba aa, ned daß a Vamisstnaunzeige mochz.
I geh jedsn a bissl auf Ualaub, weuri jo seidn Septemba vurign Joa nimma woa. Und do kummad i eh easchd noch Weihnochtn dsruck, des dauat eh a Weu, do foids doch sicha ned glei auf, waun i im neichn Joa ned do bin. Weu mi feuds scho richdig au, auf dera Wöd. I geh einsiedln, drei Joa laung. Ka Schbaas, des maan i eanst. Weu des hassd jo nix mea. Kriag fian, Bombm varschickn, und wos waass i no ois. Mia reichts! I geh! Einsiedln, wia gsogd.
Najo, oba daß ma ned faad wiad bein Einsiedln, muaß i ma wos midnemma. I hob no nie an Geemboi in da Haund ghobd. Und weuri eh so bodschad bin bein Schbün, wird des scho reichn fia de Dseid.
An Browiant muaß i ma aa midnehma, eh kloa. I kau jo ned drei Joa laung nix essn, gehd jo ned!
Oiso, wos nimm i mar mid:
Amoi a boa Pakl Reseawebatrien fian Geemboi.
Daun, aa - hm, ma is jo ka Seifa - sogma 150 Lita Rodn.
A boa Kilo schen Schbek, a boa Glasln Essichguakaln.
Und Brod? Na, des wuadad hoat, des loss i mar frisch liefan. Da
Bek farrod mi eh ned, wori bin.
No, des wiad scho zum Aushoidn sei. Und noch drei Joa, schauri wieda amoi ausse, obs scho gscheida woan is, doda. Waun jo, kumm i wieda, waun ned, foss i nua frischn Browiant aus, und an neichn Geemboi mid frische Batrien, und geh de negsdn drei Joa auf Klausua. Kunnt oiso sei, daß ma si lenga nimma seng.
Winsch i Eich hoid darweu schene Weihnochdn und an guadn Rudsch, fiad negsdn drei Joa aa glei, gö!
Schdöds nigs au, ned dassd Bolizei ausruckn muaß, wia da Hea Rädl ollaweu sogd!
Griass Eich, i wünsch Eich schene drei Joa!
Haudi.