Haudi so wia "Gaudi", nua mid "H" wia "Hawara".
Es hobds jo sicha a ghead, vo dem Bluadblasmaskandal, daß ma si do Eeds hoin kennt, waumma mid sowos behaundld wiad. A Sauarei sog i, Es ned aa?
No, bei uns in da Hockn mochns demnegsd a Gesundnuntasuchung, freiwüllich, vaschdehd si. Hod mi da Andi, unsa Britischmen, gfrogd: "Wirst du hingehen?" "Naa" hob i gsogd. "Des is jo a Gesundenuntasuchung, do kaun i ned higeh. I waass eh, daß i kraung bin". Da Andi lesd weida, und schdöhnd: "Blutabnahme, ikch hasse Blutabnahme!". Hob i gsogd "Jo mei, i mog des aa ned. Weuri dabei ollaweu eigeh, wiara behmische Leinwaund".
Najo, da Andi is do bsundas happich, dea fluachd scho, waun eam a Gösn hekd. I maan, i bin do ned so haglich, i kau de Gösn nua ned hean. Des "Siieeeeeiiiiiieeeiiiiiiiiiieeee".
Fuachdboa! Wia da Hea Rädl sogn ded. Waun i schlof, heeris eh ned, daun is ma wuaschd, obs mi hekn, weu i eh kane grossn Dibln davo kriag.
Oba da Andi! Hö! Do san amoi im Büro a boa Gösn umanaundgflogn. Is da Andi gaunz neafös woan. Hoda olle gfrogd: "Juckdsd du auch schon? Bist du auch schon gestochen?" Mi hoda gfrogd, en Berni, de Annemarie. Daunn isa aufgschdaundn, hod a Bakl Bapia gschnappd, is im Zimma umanaund gaunga, hod de Gösn gsuachd, dassas darschlogn kau, und hod doodeansd gsogd: "Drei Gelsen sind im Zimmer!" - Fuachdboa, ned woa? Höhö!
Jeds samma gaunds vom Dema ookumman. Bein Bluadoonema woama. Haumma dischgriad, obs de Bluadschbenda ned auf Eeds testn dan. Wia sowos iwahaupt bassian kau!
Frogd da Andi: "Was wern die machen mit de verseuchten Blutkonserven?" I hob amoi bled gschaud. Auf amoi schiasd ma wos! I nimm en Schbeiseblan vo dera Wochn ind Haund, schau, und sog:
"Andi, aum Dinsdog gibds in da Weakskuchl Blunzn! Kennsd di aus?" Na Moidseid! Höhö!
Seids sche braaf, und schdöds nigs au, wia da Hea Rädl ollaweu xokt hod, weu suns kummd de Bolizei!
Griass Eich, i wünsch Eich wos. Auf jednfoi ka Blunzn zum
Essn! Hö!
Haudi.