Wissds eh, da Hawara mid da Gaudi.
Mia gengan doda in da Hockn ind Werkskuchl essn, und do miass ma min Lifd von 4. Schdoog owefoan ins Eadgeschoss. Samma wieda a boa Hawara beinaund, und foan so mim Aufzug, kummd da Berni mid ana neichn Deorie:
"Des mim Lifdfoan is a Schmä", hoda gsogd, "weu ma eh imma auf da söbn Etasch san, und de tauschn nua de Schüdln um, wo draufschdehd, in wöchan Schdoog ois ma grod is." No mia haum uns rechd ooghaud, is jo lustich, de Deorie, oba wos soi den do draun woa sein?
Guad, en nextn Dog, wia ma grod vom Essn zruck kumma san, und mim Lifd wieda auffefoan, haumma a sötsaume Beobochtung gmochd.
Wia grod de Tia vom Lifd zuagehd, hod ma duach an schmoin Schboit no an Hean gseng, dea gauns hektisch zuwegwuschd is, zum Lifd. Bum, de Tia woa scho zua, und mia san gfoan.
Sogd da Dscharli: "Glaubsd, hed dea midfoan woin?" Maand da Gitti:
"Des woa ana vom Rechnzentrum."
Wia ma harom im 4. Schdoog ausschdeign, sogd ana: "He, Berni, dei Deorie schdimmd ned, weu wauns nua de Schüdln austauschn, nochan miassd jo dea Mau no vuam Lifd schdeh!" Sogd da Berni: "Na, des woa dea, dea de Schüdln tauschd, dewegn hodas so eulich ghobd!"
Höhö! Oiso, de Deorie is eaheated! Bassds amoi gnau auf, wauns mim Lifd foads, und nowos, bassds auf wo's hiischdeigts, daß Eich kan Schas eitredn duads, gö!
Griass Eich, i wünsch Eich wos!
Haudi.