Haudi so wia Gaudi, nua mit "H" wia Hawara.
I bin gfrogt woan, in ana briwatn Meel, wia des is, midn Hean Rädl.
I hob gsogt, i wer des öffentlich voglean, damids daun olle wissn. Oissa, den Hean Rädl, den gibds ned wiakli (oda doch?), des is eigentlich da Tschoosi Prokopez.
Da Hea Rädl is a zeitlaung aum Sundog nochmidog um viadl noch ans kumman auf Radio Dsedeh (CD International, domois no 101.8 FM, jetz 96.6).
Daunn hoda vo eanan Schdaumdisch, bein Pühringa, bein Otto, eanan Wiatn, dazöd. Do san dabei:
da Rädl söwa, oiso da Alfons Rädl, daun da Eisane, da Korosids, sei Hawara, daun da oide Schmuds, da Alois, eana Hausmasda, daun da Göschdl Eanstl, eana Greissla, da Böcha Bepi, da Gaskassia (a botzn Roda), daun da Leitna Helmut, da Helmi, da Bodemasda vom Deresienbod (dea hods mid de Weiba, ollaweu hoda a aundare Kods), und da Hea Regierungsrot Marschits, dea midn Seidl midn Biaweama, oda mid an Hefarl Dee dabeisizt, und foiweis kumman no voa de Gisi, de wos en Pühringa, en Otto, eanan Wiatn sei Frau is, daun de Wuzi, en Rädl sei Oide, de Göschdl Riki, en Göschdl Eanstl sei Frau, de Wilma, de wos en Böcha Bepi sei Frau is, und de Martha, i glaub so hassts, en Regierungsrot Marschits sei Frau. Da Leitna Helmut, da Helmi, da Bodemasda vom Deresienbod, hod hoid, wia gsogt, dauand a aundare. Und von Eisanan, von Korosids, en Rädl sein Hawara, waas i nigs, dass dea a Oide hod. Nau, und da Rädl darzöhlt hoid de indellentn Gschichtn, wos do beim Pühringa, en Otto, eanan Wiatn, am Schdaummdisch rennan. A bissl an Schbrochföhla hoda hoit, da Hea Rädl, ea hod, wia ma do sogt, a "Hötchl", gmaand is a Hölzl, im Mund. Do head si daun a "S" gnauso aun wia a "SCH", oba ned wia "SCH", sondan echa wia "CHL".
Des gehd ungefea a so: "Grüchi Rädl, Rädl cho wia Chädl, nua mid "R", wi wi wiwi Rudl."
Na und des san hoid duatn de Obagscheidn, voa oim da oide "Chmudch", da Hausmasda. Maunchmoi wiads daun en Regierungsrot "Marchitch" zbled, daun funkta dazwischn, sunds reta jo ned so vü.
Is des jeds so hoibwegs kloa, mitn Hean Rädl. Am Schlus sogta hoit ollaweu:
"Chanche braaf und chdönch nigch aun, weul chunch kummd de Bolidchei", und weu i jo ned wü, dass ana vo eich ins Hefn kummd, zitia i aum Schlus gern en Hean Rädl.
Sads sche braaf und schdöds nigs aun, weul sunds kummd schdod en Griskindl de Bolidsei, wia da Hea Rädl vo Radio Dsedeh gsogt hod.
Griass Eich, i wünsch Eich wos!
Haudi