Haudi so wia "Gaudi", nua mit "H", wia "Hawara".
Wos damman heit beschbrechn? Losds mi amoi nochdengn, woat - wos woit i Eich dadsöhn - ah, i waass scho wieda. Genau, i woit mid Eich a bissl üba Vakeasmittl redn. Naaaaaa, ned wos Es scho wieda dengds, ned vo den Vakeasmittl, des wos en Ötzi, wissds eh, den dsaumdeadn Hawara, dea wos augflaschld aum Similaungledscha fümfdausdn Joa vabüsld hod, wia de Babara, mei Kollegin, gschriebn hod, föd.
Vo gaunds aundare Vakeasmittl woit i wos dadsön, vo soichane, de wos aun an so an Schniarl hengan, so wia de Tramwei, de Bim, wia ma do in Wean sogd, oda da O-Bus.
Weu i grod Bim sog, foid ma ei, wiari amoi wem vaschregd hob. Auf Radio Dsedeh haums a Dseidl laung fian Vakeasfunk es Bimbim vo ana Schdrossnbaun ghobd, so wia hoid de auf Öhdrei es Düdldüdüdldüdüdldü haum. No, i foa midn Auto in an Gasslweari umanaunda, hob en Radio auf hundadanskommaochd, oiso auf Dsedeh Intaneschanel schbün, auf amoi rennd ma ana vuas Auto, i muass gach bremsn. In den Moment gehd grod da Vakeasfunk au, und wissds eh, do wiad da Radio a bissl lauda. Mochds oiso gaunds laud *BIMBIMBIM BIMBIM*, und nadiali ka Tramwei weid und brad. Na den hods grissn, höhö, des hed i Eich vagunnd!
Jeds samma a bissl vom Dema ookumman, - wos woit i eigendlich - aajo, waass scho wieda. Des Schniarl, genau, des Schniarl, wo de Bim drauhengd, odar aa da O-Bus. I hob mi scho efda gfrogd, fia wos des Schniarl guad is. Mia hod amoi ana wos dadsöd, dass de Bim do en Schbrid aussadsudsld, und des waad da Schdrom, hoda gsogd, da Schbrid vo da Bim is da Schdrom. A so a Bledsinn, und iiii soi des glaubn. I man, i foa midn Auto jo aa ned unta ana Peiplein noche, und loss ma en Bentsin aun an Schniarl in Vagasa drebfln, so wiara Infusion. I dsah ma mein Schbrid, wos i dsum Foan brauch, söba mid, im Tank, ned woa? Und asoo kennd de Bim jo des aa mochn. I maan, waun do in den Schniarl, woo's drauhengd, wiakli da Schbrid drin is, daun kennt sa si jo aa des, wos dsum Foan brauchd, midnemman. Dsum Beischbü, dass des Schniarl aafoch aufwikld, auf a Schbuin. Des warad jo glei gscheng, aamoi foan und de gaundse Wigs is aufgschbuind, und basda. Und aussadem, fia wos brauchad ma do a Schbuin, waun de Bim mid Schdrom foad, den kunnt ma jo aa in an Tank eifün. En Schdrom kau ma ned in an Tank eifün, sogds Es? Geh, dadsöhds ma nigs, schauds amoi in Eicha Autobatrii eine, wias do drin umanaund- schwabbld, und do is jo da Schdrom drin, oda? Da mochd ma kana wos vua, mei liaba, weu do kenn i mi aus. I bin jo söba Ölegdroinschenea.
Oiso des kauns ned sei, weu sunds mochads jo de Bim eh a so. Vielleichd foad de Bim jo goaned mid Schdrom? I maan hoid nua, weu i do an Vadochd hob. Weu bein O-Bus, des hob i scho aussagfundn, is des gaunds aafoch: Des is a gaunds a hundsdrek- schdinknoamala Autobus, und dea brauchd des Schniarl nua, damid a si ned vafoad! Oba bei da Tramwei kaun des aa ned schdimma, weu de hod jo eh Schienen, de kaun si goa ned vafoan, nedamoi wauns wü.
Na i sog Eich, i hob a des ausdakundschofded, Es weads es goa ned glaubm. Des Schniarl bei da Tramwei brauchns nua, dassas auf de Schienen weidadsahn kennan! De Hakla von Magisdrad sitsn in da Remisn und dsahn aun dem Schniarl au, des is! Und weu de olle Bif miad wean, und si ausrosdn dan, gehd a nigs weida mid da Bim, und waumma auf ane woat, schdehd ma a Ewichkeid, bis dass ma Wuatsln gchlogn hod.
Na seawas, jeds faung i aa scho es "hödchln" au, wia da Hea Rädl vo Radio Dchedeh.
Weu ma grod beim Hean Rädl san - wia sogta imma?
"Chanche braaf und chdön'Ch nigch aun, weu chunch kummd de Bolidchei. Grüch Chi!"
Griass eink, i wünsch eink wos!
Haudi.