So soid ma awadn
1. D'awad is a Eaholung wo ma ois wos anstrengend is unbedingt vameidn soit. Wenn wer bei da Awad schwitzt, nachad muass a sofort aussegschmissn wean.
2. Ofanga zum Awan soid a jeda dann, wann a meng duad. Alladings ned vor Zehne Voamiddog. Und bevoa ogfanga wead, kriagt ma frische Semmen oda Brezn, oda an Kafää und an Kuacha. Zoin duad des seibstvaschdendlich da Schääf.
3. Griang muass ma mindestens an zwanzga in da Schdund, dazua kemman no s'Essn, a Biar und bei Bedarf Zigarettn oda Zigan.
4. D'Weibaleid in da Awad ham in am Top-Gwand aufzumgreizn, wenn oane dabei is, de wo guad ausschaugt, dann muass unbedingt a kurz Gwand, oda glei a Miniroog sei. Massangefertigt, aba des vaschdähd se eh vo seiba. Und das des a da Schääf zoid, des is eh klar.
5. A jeda dea wo lenga wia 5
Wocha in da Firma is, dea wead in da fria mit am saudeian Auto in d'Awad
gfahrn und auf d'Nocht wieda mim Auto hoam gfahrn. Da Fahra hod freindlich
zum sei, und de Dia beim Ei- und Ausschdeing
auf- und zua zum macha.
6. Beim Awan deaf gsunga und pfiffa wean. Wenn oana a bekannts Liadl ostimma duad, nachad muass a jeda sofort noch besdn Wissn und Gwissn midpfeiffa oda midsinga. Duads oana ned, nachad konna endlassn wean.
7. Vo zweife bis um drei Nammidog is Middog. Olle Arbeiter deaffan an am guad gschmüggdn Tisch Plooz nemma.
8. Vo drei bis um viere is gmiadlichs Beinandasei, do gibts a Kafää und Kuacha, aussadem soagd in dera Zeid a da Schääf fiar a zimbfdige Musi.
9. Wenn oana bei da Awad eischlaffa duad, dann deafa unda goar koane Umständ aufgweckt wean, aussa es is Feiaomnd.
10. Ummara fümfe is Feiaomnd. Beim Hoamgeh muass da Schääf am jedn d'Hand schüddln, und eam im Nama da Firma herzlichst fia de aufobfande Tätigkeit danga.
11. Wenn oana während den Pausn aufs Heisl muass, nachad soida schaung, obas ned no a weng aushoid, wei fia aufs Heisl geh is die Awadszeit do.
12. Wui oana vo da Firma heiradn,
dann deaf da Schääf fia d'Ausschdeia sorng. D'Hochzeid is a im
Schääf seina Wohnung, oda wenn da Schääf bloos a kloane
Wohnung hod, in oan vo eam zoidn Raum vo ana guadn und
deian Wiadschaft. Dea wo gheirad
hod, muass mindestens oa Woch bezahlten Sondaurlaub griang, und wenna
noch oana Woch no ned in da
Lage is in d'Awad zum kemma, griagt a no a Woch Valengarung.
13. Wenn se zwoa oda meara schdrein in da Awad, dann soid ma de Firmeneinrichtung möglichst schona. Bei Bedarf konn ma se Oxnfiesl oda wenns ganz wuid wead, a Bisdoin beim Betriebsrat hoin.
14. Und da allgemeine Wahlschbruch
bei uns in da Firma is: Wos heid ned feadig wead, des bleibt ling bis moing!
(Bertl, 13.10.1998)